NPN

విశాఖపట్నం : శ్రీలంకను కకావికలం చేసి 56 మంది ప్రాణాలను బలిగొన్న ‘దిత్వా’ తుఫాన్‌ తమిళనాడు, దక్షిణ కోస్తా తీరం వైపు దూసుకొస్తోంది. అయితే తుఫాన్‌ ఉత్తర తమిళనాడు, దక్షిణ కోస్తా వైపు వస్తుందని చెబుతున్న భారత వాతావరణ శాఖ.. ఎక్కడ తీరం దాటుతుందనేది చెప్పలేదు. పలు అంతర్జాతీయ మోడళ్లు కూడా తీరం దాటే విషయంలో అంచనాలు వేస్తున్నాయి తప్ప స్పష్టత ఇవ్వడంలేదు. అయితే తుఫాన్‌ తీరం దాటే ప్రాంతాన్ని బట్టి కోస్తాంధ్రకు నష్టం ఉంటుందని మాత్రం వాతావరణ నిపుణుడొకరు తెలిపారు.

తుఫాన్‌ ప్రభావం ఇలా..

శ్రీలంక.. దానికి ఆనుకుని నైరుతి బంగాళాఖాతంలో ఉన్న ‘దిత్వా’ తుఫాన్‌ శుక్రవారం గంటకు ఐదు నుంచి పది కిలోమీటర్ల వేగంతో ఉత్తర వాయవ్యంగా పయనించింది. తుఫాన్‌ ప్రభావంతో శ్రీలంకలో కుంభవృష్టిగా వర్షాలు కురుస్తున్నాయి. తుఫాన్‌ శుక్రవారం సాయంత్రానికి చెన్నైకు దక్షిణంగా 510 కి.మీ.దూరంలో కేంద్రీకృతమై ఉంది. ఇది ఉత్తర వాయవ్యంగా పయనించి ఈనెల 30వ తేదీ ఉదయానికి ఉత్తర తమిళనాడు, దక్షిణ కోస్తాంధ్ర వైపు వస్తుందని భారత వాతావరణ శాఖ తెలిపింది. దీని ప్రభావం శనివారం నుంచి మూడు రోజులపాటు కోస్తాంధ్ర, రాయలసీమలపై ఉండే అవకాశం ఉందని పేర్కొంది. తుఫాన్‌ ప్రభావంతో శనివారం దక్షిణ కోస్తా, రాయలసీమల్లో పలుచోట్ల, ఉత్తరకోస్తాలో ఒకటి, రెండుచోట్ల వర్షాలు కురుస్తాయి. నెల్లూరు, తిరుపతి, చిత్తూరు జిల్లాల్లో అక్కడక్కడా భారీ నుంచి అతిభారీ, ప్రకాశం, కడప, అన్నమయ్య జిల్లాల్లో భారీవర్షాలు కురుస్తాయి. తుఫాన్‌ కోస్తా వైపు వచ్చే క్రమంలో శనివారం రాత్రి నుంచి వర్షాలు పెరగనున్నాయి. ఈనెల 30న కోస్తా, రాయలసీమల్లో విస్తారంగా, నెల్లూరు, తిరుపతి, చిత్తూరు, అన్నమయ్య జిల్లాల్లో కుంభవృష్టిగా, ప్రకాశం, కడప జిల్లాల్లో అక్కడక్కడా అతిభారీ, బాపట్ల, గుంటూరు, పల్నాడు, ఎన్టీఆర్‌, కృష్ణా, అనంతపురం, శ్రీసత్యసాయి, నంద్యాల జిల్లాల్లో భారీవర్షాలు కురవనున్నాయి. సోమవారం రాయలసీమ, దక్షిణ కోస్తాలో విస్తారంగా, ఉత్తర కోస్తాలో పలుచోట్ల వర్షాలు, నెల్లూరు, ప్రకాశం, బాపట్ల, గుంటూరు, పల్నాడు, కృష్ణా, ఎన్టీఆర్‌, తిరుపతి, కడప జిల్లాల్లో భారీవర్షాలు కురుస్తాయి. రాష్ట్రంలోని అన్ని ఓడరేవుల్లో రెండో నంబరు భద్రతా సూచిక ఎగురవేశారు. శనివారం నుంచి కోస్తాలో తీరం వెంబడి గంటకు 50 నుంచి 60, అప్పుడప్పుడు 70 కి.మీ. వేగంతో గాలులు వీస్తాయి. శనివారం అర్ధరాత్రి నుంచి గాలులు తీవ్రత మరింత పెరుగుతుంది.

ఏయే ప్రాంతాలపై ప్రభావం?

తుఫాన్‌ తీరం దాటే ప్రాంతాన్ని బట్టి కోస్తాంధ్రకు, చెన్నై, నెల్లూరు మధ్యన తీరం దాటితే నెల్లూరు, దానికి ఆనుకుని ఉమ్మడి చిత్తూరు, కడప, ప్రకాశం, గుంటూరు జిల్లాల్లో కొంతభాగంపై ఎక్కువ ప్రభావం చూపుతుందని వాతావరణ నిపుణుడొకరు తెలిపారు. చెన్నైకు సమీపంగా వచ్చిన తరువాత తుఫాన్‌ కోస్తాంధ్రకు సమాంతరంగా వచ్చి కాకినాడ, మచిలీపట్నం మధ్య తీరం దాటితే ఉత్తరకోస్తాలో విశాఖపట్నం జిల్లా నుంచి నెల్లూరు వరకూ, దానికి ఆనుకుని రాయలసీమ జిల్లాల్లో వర్షాలు ఎక్కువగా ఉంటాయని వివరించారు. తుఫాన్‌ తీరం దాటే విషయంలో శనివారం స్పష్టత వస్తుందని మరికొందరు నిపుణులు చెబుతున్నారు. అయితే తుఫాన్‌ కోస్తా, రాయలసీమల్లో అనేక ప్రాంతాలపై ప్రభావం చూపే అవకాశం ఉన్నందున రైతులు, ప్రజలు అప్రమత్తంగా ఉండాలని సూచిస్తున్నారు.