NPN

న్యూఢిల్లీ : తెలుగుదేశం నాయకుల జంట హత్యల కేసులో వైసీపీ నేత, మాజీ ఎమ్మెల్యే పిన్నెల్లి రామకృష్ణారెడ్డి, ఆయన సోదరుడు వెంకటరామి రెడ్డికి సుప్రీంకోర్టులో ఎదురుదెబ్బ తగిలింది. ఈ ఇద్దరికి గతంలో తానిచ్చిన ముందస్తు బెయిల్‌ను సుప్రీంకోర్టు రద్దు చేసింది. సెక్షన్‌161 కింద నమోదు చేసిన డాక్యుమెంట్లు నిందితుల వద్దకు చేరడంపై అసహనం వ్యక్తం చేసింది. ముందస్తు బెయిల్‌ పొందే అర్హతే పిన్నెల్లి సోదరులకు లేదంటూ ఘాటుగా వ్యాఖ్యానించింది. ఏపీలో పోలీసులు నిందితులకు సహకరిస్తున్నారా? అంటూ ఆగ్రహం వ్యక్తం చేసింది. ఈ ఏడాది మే 24వ తేదీన పల్నాడు జిల్లా వెల్దుర్తి మండలం గుండ్లపాడుకు చెందిన టీడీపీ నేతలు జవిశెట్టి వెంకటేశ్వర్లు, జవిశెట్టి కోటేశ్వరరావుల జంట హత్యలు రాష్ట్రంలో కలకలం సృష్టించాయి. ఈ కేసులో ఏ1 గా జవిశెట్టి శ్రీను, ఏ2గా తోట వెంకట్రావు, ఏ3గా తోట గురవయ్య, ఏ4గా నాగరాజు, ఏ5గా తోట వెంకటేశ్వర్లు, ఏ6గా పిన్నెల్లి రామకృష్ణారెడ్డి, ఏ7గా పిన్నెల్లి వెంకట్రామిరెడ్డిని చేర్చారు. తమకు ముందస్తు బెయిల్‌ ఇవ్వాలంటూ పిన్నెల్లి సోదరులు హైకోర్టును ఆశ్రయించగా, న్యాయస్థానం నిరాకరించింది. హైకోర్టు తీర్పును సెప్టెంబరు 1న పిన్నెల్లి సోదరులు సుప్రీంకోర్టులో సవాలు చేశారు. అన్నదమ్ములిద్దరికీ సుప్రీంకోర్టు మధ్యంతర రక్షణ కల్పించింది. ముందస్తు బెయిల్‌పై మాత్రం విచారణ కొనసాగుతోంది. తుది నిర్ణయం వెలువరించేంత వరకు వారిని అరెస్టు చేయవద్దని ఆదేశాలను జారీ చేసింది. ఈ పిటిషన్‌ శుక్రవారం జస్టిస్‌ విక్రమ్‌ నాథ్‌, జస్టిస్‌ సందీప్‌ మెహతాతో కూడిన ద్విసభ్య ధర్మాసనం ఎదుట విచారణకు వచ్చింది.

నిందితులు విచారణకు సహకరించడం లేదు : లూథ్రా

కేసు విచారణ ప్రారంభం కాగానే.. ఏపీ ప్రభుత్వం తరఫున సీనియర్‌ న్యాయవాది సిద్ధార్థ్‌ లూథ్రా వాదనలు వినిపించారు. ‘‘సుప్రీంకోర్టు ఆదేశించినప్పటికీ నిందితులు పోలీసు విచారణకు ఏమాత్రం సహకరించడం లేదు. సాక్షులను బెదిరిస్తున్నారు. సాక్ష్యాలను ట్యాంపర్‌ చేేసందుకు ప్రయత్నిస్తున్నారు.’’ అని తెలిపారు. సెక్షన్‌ 161 కింద నమోదు చేసిన డాక్యుమెంట్లు నిందితులకు ఎలా అందాయని ఈ సందర్భంగా జస్టిస్‌ విక్రమ్‌నాథ్‌ ప్రశ్నించారు. ‘మీరే దీనికి సమాధానం చెప్పాలి’’ అని లూథ్రాను ఉద్దేశించి అన్నారు. ‘‘161 ేస్టట్‌మెంట్ల కాపీ నిందితుల వద్ద ఎలా ఉంది? వారు దానిని ఈ కోర్టు ముందు కూడా దాఖలు చేశారు!. అసలు ఈ పత్రాలను వారు ఎలా పొందారు?’’ అని పిటిషనర్లలో ఒకరి తరఫున హాజరైన సీనియర్‌ న్యాయవాది సిద్ధార్థ్‌ దవేను జస్టిస్‌ విక్రమ్‌ నాథ్‌ ప్రశ్నించారు

కేసు డైరీ పొందిన తీరులోనే మీ నైజం తెలుస్తోంది : బెంచ్‌

న్యాయస్థానం ద్వారానే తమకు పత్రాలు అందాయని దవే వాదించే ప్రయత్నం చేయగా, జస్టిస్‌ సందీప్‌ మెహతా అభ్యంతరం తెలిపారు. ‘‘లేదు! అలా జరగకూడదు. కోర్టు మీకు కేసు డైరీని ఎప్పటికీ ఇవ్వదు. అసలు..అటువంటి అవకాశమే లేదు’’ అని వ్యాఖ్యానించారు. సిద్ధార్థ్‌ లూథ్రా మరోసారి ఆందోళన వ్యక్తంచేస్తూ, ‘‘ఇది లోతుగా ఆలోచించాల్సిన అంశమే. ఇది పెద్ద సమస్య, నేను కూడా షాక్‌కు గురయ్యాను’’ అని అన్నారు. మరోసారి.. జస్టిస్‌ మెహతా కలుగజేసుకుని ‘‘ఇది ఏమాత్రం ఆమోదయోగ్యం కాదు. మీరు ఏ విధంగా దీనిని పొందినా అది సరికాదు. ఇది సాధారణ కేసు కాదు కదా? ఇది డబుల్‌ మర్డర్‌ కేసు. ఇంతటి సీరియ్‌సనెస్‌ ఉన్న కేసుకు సంబంధించిన కేసు డైరీని మీకు పళ్లెంలో పెట్టి మరీ అప్పగించారు’’ అని ఆందోళన వ్యక్తం చేశారు. ‘‘మీరు కేసు డైరీని సంపాదించిన విధానం, మీ కుట్ర మనస్తత్వాన్ని, అసలు నైజాన్ని స్పష్టం చేస్తోంది. కేసు డైరీలోని అంతర్గత వాస్తవాలు మీకు ఎలా తెలుసు? ఇది మీ కస్టోడియల్‌ దర్యాప్తు అవసరమైన కేసు’’ అని జస్టిస్‌ మెహతా ఆగ్రహం వ్యక్తం చేశారు. సిద్ధార్థ్‌ దవే మరోసారి వాదనలు కొనసాగిస్తూ.. కేసులో ప్రధాన ఆరోపణలు కేవలం వదంతుల ఆధారంగానే ఉన్నాయని ధర్మాసనానికి వివరించారు. పోలీసులు ప్రస్తావించిన ఫోన్‌ సంభాషణలు కేవలం 56 సెకన్లు, 7 సెకన్లు మాత్రమే ఉన్నాయని, ఇంత తక్కువ సమయంలో హత్యకు కుట్ర పన్నడం ఎలా సాధ్యమని, ఇది పూర్తిగా నిరాధారమైన ఆరోపణ అని వాదించారు. ఇది రాజకీయ ప్రతీకార చర్యని ఆరోపించారు. అయితే, దవే వాదనలతో ధర్మాసనం ఏ మాత్రం ఏకీభవించలేదు. ‘‘నిందితుల పరిధి చూసి మేము ఆశ్చర్యపోతున్నాం. కేసును ఎంతలా ప్రభావితం చేయగలరో కేసు డైరీని పొందడాన్ని చూేస్త అర్థమవుతోంది?’’ అని జస్టిస్‌ మెహతా పునరుద్ఘాటించారు. మళ్లీ దవే..ఇది రాజకీయ కోణంలో పెట్టిన కేేసనని వాదించే ప్రయత్నం చేయగా..‘‘ఇకనైనా మీరు కేసు లోపలికి వెళ్లి చూడండి.. మీకే అర్థమవుతుంది’’ అని ధర్మాసనం వ్యాఖ్యానించింది. మరో సీనియర్‌ న్యాయవాది షోయబ్‌ ఆలం.. మరో పిటిషనర్‌ తరఫున వాదనలు వినాలని విజ్ఞఫ్తి చేయగా ధర్మాసనం నిరాకరించింది. పిన్నెల్లి సోదరుల ముందస్తు బెయిల్‌ పిటిషన్లు కొట్టివేస్తున్నట్టు ప్రకటించింది. ఇద్దరినీ ఆరెస్టు చేయడానికి పోలీసులు అనుమతులు తీసుకోవాల్సిన అవసరం లేదని స్పష్టం చేసింది. రెండు వారాల సమయమివ్వాలని సిద్ధార్థ్‌ దవే కోరగా, ఆ విజ్ఞప్తిని పరిగణనలోకి తీసుకుని, పిన్నెల్లి సోదరులు లొంగిపోవడానికి రెండువారాల సమయం ఇచ్చింది.